Հայ

Նախկին Տնօրեն

ՎԱՅՈՑ ՁՈՐԻ ՏԱՐԱԾԱՇՐՋԱՆԱՅԻՆ ՊԵՏԱԿԱՆ ՔՈԼԵՋԻ ՆԱԽԿԻՆ ՏՆՕՐԵՆ ԽԱՉԱՆՈՒՇ ՍԱՐԳՍՅԱՆԻ ԳՈՐԾՈՒՆԵՈՒԹՅԱՆ ՄԱՍԻՆ

ԿԵՆՍԱԳՐՈՒԹՅՈՒՆ

Սարգսյան Խաչանուշ Երեմի ծնվել է Վայոց Ձորի մարզի Խաչիկ գյուղում: 
1971թ. ավարտել է Երևանի Խ.Աբովյանի անվան Հայկական Պետական մանկավարժական ինստիտուտը և աշխատանքի անցել Ռինդի միջնակարգ դպրոցում: 
1972թ. ընտրվել է Կոմերիտմիության Եղեգնաձորի շրջանային կոմիտեի քարտուղար: 
1980թ. - ին գործուղվել է Երևանի էլեկտրոմեխանիկական տեխնիկումի Եղեգնաձորի մասնաճյուղ, որպես տնօրեն: 
1993թ. հաշվի առնելով երկրի սոցիալ–տնտեսական պայմանները ,ուսումնական հաստատությունը վերապրոֆիլավորվել և արձել է Երևանի ֆինանսատնտեսագիտական տեխնիկումի մասնաճյուղ, Խ. Սարգսյանը աշխատել է տվյալ հաստատությունում որպես տնօրեն:
2001թ. Երևանի ֆինանսատնտեսագիտական քոլեջի Եղեգնաձորի մասնաճյուղն առանձնացել և դարձել է Եղեգնաձորի պետական քոլեջ, այնուհետև Վայոց ձորի տարածաշրջանային պետական քոլեջ, որտեղ Խ.Սարգսյանը որպես տնօրեն աշխատել և շարունակում է աշխատել մինչ օրս:

 ԻՐԱԿԱՆԱՑՐԱԾ ԾՐԱԳՐԵՐԸ

Հեղինակ է բազմաթիվ գրանտային ծրագրերի,որոնց իրականացումը նպաստել է ուսումնական հաստատության գոյատևմանը: 
1997թ. Համակարգչային ուսուցման կենտրոնի ստեղծում -,,ՓԵ,,կազմակերպության օժանդակությամբ 
1997թ ,, Փոքր բիզնես,-ի ուսուցում - Աշխատանքի և սոցիալական հարցերի նախարարության օժանդակությամբ 
2001թ. Ինտերնետ կենտրոնի ստեղծում-IREX-ի ֆինանսավորումով 7 տարի ժամանակով 
2002թ. ,,Ընդդեմ համամարդկային ոճրագործությունների,, թեմայով ցուցահանդեսների կազմակերպում , թվով 25 երեխաների համակարգչային նկարչական ծրագրի ուսուցում - IREX-ի ծրագիր 
2003թ.,, Եղեգնաձորը որպես տուրիզմի կենտրոն,,- IREX-ի ծրագիր
2003-2005թթ Աշխատանքի և սոցիալական հարցերի նախարարության «Զբաղվածության ծառայության վարչություն» -ՈՒսուցման կարճաժամկետ ծրագրերի իրականացում, մրցույթյին ծրագրեր` տարբեր մասնագիտությունների գծով 
2006-2007թթ Համաշխարհային բանկի ֆինանսավորմամբ տարածաշրջանի ուսուցիչների վերապատրաստում/ Համակարգչային ուսուցման ծրագիր/ 2006-2008թթ.Գերմանական DVV international կազմակերպության օժանդակությամբ իրականացվել է «Գիդերի վերապատրաստում.» և «Կար և հագուստի ձևավորում» վերապատրասման ծրագրերը 
2009թ-«Աշխարհի Միացյալ Քոլեջներ» կազմակերպության Իտալական և Բրիտանական քոլեջների ուսանողների հետ «Ամառային ճամբար` Հայաստանում» ծրագրի շրջանակներում պատմական հուշարձանների վերականգնման և իտահետազոտական աշխատանքների կազմակերպում

 

ԱՅԼ ՏՎՅԱԼՆԵՐ

Դասավանդման արդյունավետ մեթոդների, մանկավարժության, հոգեվերլուծության և դաստիարակչական այլ խնդիրների վերաբերյալ մի շարք հոդվածների հեղինակ է: 
1997թ-ից զբաղվում է նաև համակարգչային գրաֆիկայով ունի շուրջ 1200 ուշադրության արժանի գեղարվեստական գործեր: Ունեցել է անհատական ցուցահանդեսներ: 
2002թ.- Ստեղծագործական աշխատանքներից 130-ը անիմացիոն ֆիլմի տեսքով ներկայացվել է Ավստրիայի Գրաց քաղաքում կայացած համակարգչային գրաֆիկական աշխատանքների միջազգային ցուցահանդեսին , առաջնություն շահել և մեծ ուշադրության է արժանացել: 
2002թ. -Բուենոս-Այրեսում կայացած Կանանց միջազգային ֆորումին մասնակցելու իրավունք է ստացել, ներկայացրած թեզը և շխատանքները հրատարակվել են ֆորումի կողմից : 
2003թ. սեպտեմբերին 150 աշխատանք ներկայացվել է Ավստրիայի Կլագենֆուրտ քաղաքում կազմակերպված համակարգչային գրաֆիկայի միջազգային ցուցահանդեսին , ,առաջնություն է շահել և հրավերներ ունեցել մի շարք քաղաքներից-Բուենոս-Այրես 2002թ, Վիեննա, Վենետիկ 2003թ ,Փարիզ 2005թ., Չիկագո 2009թ: Ունեցել է անհատական ցուցահանդեսներ ,ներկայացրել է թեզեր: 
Իր գործի նվիրյալն է, որի արդյունքում ուսումնական հաստատությունն այսօր համարվում է մարզի ավանդույթներով հարուստ, իր ուրույն դեմքն ունեցող կրթօջախը:

Վայոց ձորի տարածաշրջանային պետական քոլեջի տնօրեն Խաչանուշ Սարգսյան

<<ՊԵՏՔ Է ՄԻՇՏ ԶԳԱՍ ԺԱՄԱՆԱԿԻ ԶԱՐԿԵՐԱԿԸ...>>
ՀԱՐՑԱԶՐՈՒՅՑ  ՎԱՅՈՑ ՁՈՐԻ  ՏԱՐԱԾԱՇՐՋԱՆԱՅԻՆ ՊԵՏԱԿԱՆ  ՔՈԼԵՋԻ  ՏՆՕՐԵՆ  ԽԱՉԱՆՈՒՇ  ՍԱՐԳՍՅԱՆԻ ՀԵՏ

- Շուրջ մեկ տարի է, ինչ Եղեգնաձորի  պետական քոլեջը  վերանվանվել է Վայոց ձորի տարածաշրջանային պետական քոլեջ: Դա պարզապես անվանափոխություն էր, թե  գործունեության նոր եղանակ և նպատակ:
- Դա, իհարկե, միայն անվանափոխություն չէր, այլ տարածաշրջանում նոր դերի և գործառույթների  ստանձնում, նոր նպատակների և անելիքների առաջադրում: Հանրապետությունում գործող  միջին մասնագիտական  և արհեստագործական  հաստատություններից 12-ը, այդ թվում նաև  մեր քոլեջն ընդգրկվել  են բազմագործառութային համարվող հաստատությունների ցանկում, ինչը  ենթադրում է նյութատեխնիկական հարուստ բազայի առկայություն, որակյալ կրթության  իրականացում, տարածաշրջանում  կրթական ոլորտի  առաջատարի  դերակատարում:Բազմագործառութային  տարածաշրջանային քոլեջի նպատակը պետք է  լինի  կրթական գործի  կազմակերպումը լայն իմաստով տարբեր հարթությունների վրա`  սկսած  մասնագիտական կողմնորոշման խնդիրներից մինչև  գործատուների հետ համագործակցության  շրջանակների   ընդլայնումը:
- Վերջին շրջանում լրատվամիջոցների    և պետական մարմինների  կողմից  պարբերաբար խոսվում է միջին մասնագիտական  և արհեստագործական  կրթության կարևորության մասին: Ո՞րն է  այսօր կրթության այս օղակի և մասնավորապես  Ձեր քոլեջի դերն ու առաքելությունը:
- Խորհրդային ժամանակներում  մեծապես արժևորվում էին կրթության այս օղակի  դերը և նրա շրջանավարտների  մասնագիտական կարողությունները, սակայն անցումային ժամանակաշրջանում կարծես մասամբ անուշադրության մատնվեց  այս օղակը, որի արդյունքում  մենք ունենք որակյալ  բանվորների, արհեստավորների «ծերացող սերունդ», որին փոխարինողներ չկան: Այս բացը լրացնելու, աշխատաշուկայի պահանջարկի հավասարակշռությունը պահելու, որակյալ  արհեստավորներ ունենալու նպատակով  հատկապես լուրջ ուշադրություն է դարձվում արհեստագործական կրթությանը,  իսկ միջին մասնագիտական օղակի շրջանավարտները ,գաղտնիք չէ, որ մշտապես  համալրել են հենց միջին օղակի որակյալ մասնագետների  բանակը`  իրավագետներ, ֆինանսիստներ, հաշվապահներ և այլն:  Ի թիվս նշվածների`  հավելենք, որ մեր կրթօջախը  տասնամյակներ շարունակ եղել է և մնում է  երիտասարդ սերնդի  կրթության և դաստիարակության  բարդ, պատասխանատու, բայց և շնորհակալ գործի  իրականացնողը:
- Որակյալ կրթություն  իրականացնելու համար անհրաժեշտ է նյութատեխնիկական բազա: Ինչպիսի՞ն են այդ պայմանները քոլեջում:
-Եվրոծրագրերի  շրջանակներում հիմնանորոգվել են  քոլեջի 2 մասնաշենքերը,  նորացվել է ողջ գույքը, ունենք փայտամշակման, կարի, համակարգիչների նորոգման, վարսավիրական գործի արհեստանոցներ, ժամանակակից մարզասարքերով կահավորված սրահ, համակարգչային հինգ լսարան, ինտերակտիվ երկու լսարան, լինգաֆոնային կաբինետ, ժամանակակից սարքավորումներով հագեցված տաս լաբորատորիաներ և առարկայական կաբինետներ: Կառանձնացնեի հատկապես <<Ավտոմոբիլային տրանսպորտի տեխնիկական սպասարկում և նորոգում>> մասնագիտության` իտալական նորագույն սարքավորումներով զինված կաբինետը: Նյութատեխնիկական հարուստ բազան իսկապես թույլ է տալիս  իրականացնելու  որակյալ կրթություն:
- Գիտենք, որ արդեն երկու տարի է`  քոլեջում կիրառվում է ուսուցման նոր  մոդուլային համակարգը: Ո՞րն է դրա առանձնահատկությունը:
- Մոդուլային ուսուցումը եվրոպական մի շարք պետություններում հաջողությամբ քննություն բռնած  համակարգ է, որի նպատակն է նախկին  գիտելիքահենք  կրթությունից անցում կատարել դեպի գործնական կարողությունների և հմտությունների ձևավորմանը  միտված  ուսուցում կազմակերպելուն: Սա բովանդակային և որակական լուրջ խնդիր է, որին  հասնելու համար նախատեսվում է գործնական պարապմունքների մեծ  ժամաքանակ, ավանդականի կողքին ուսուցման  ժամանակակից մեթոդների կիրառում, դասի անցկացման  նոր եղանակ:Լուրջ ուշադրություն է հրավիրվում դասավանդող մասնագետների որակավորման բարձրացման խնդիրներին, պարբերաբար կազմակերպվում են վերապատրաստման դասընթացներ: Քոլեջի չորս աշխատակիցներ մասնակցել են չափորոշիչների, մոդուլների, ուսումնական ձեռնարկների ստեղծման աշխատանքներին: Նախարարության`  մոդուլային  ուսուցման ընթացքին  հետևող  համապատասխան օղակների ներկայացուցիչները  պարբերաբար   այցելում են քոլեջ, ծանոթանում տեղում այս գործընթացին և փաստում, որ այն մեր կրթօջախում ճիշտ հիմքերի վրա է դրված:
- Ուսուցանող մասնագիտություններն ընտրելիս ի՞նչ  չափանիշներով եք առաջնորդվում:
- Հիմնական չափանիշներն սրանք են. տվյալ մասնագիտությունը որքանով է համապատասխանում մեր տարածաշրջանի  սոցիալ-տնտեսական  զարգացման առանձնահատկություններին և աշխատաշուկայի պահանջներին, որքանով է այն արդիական և հեռանկարային:
- Ի՞նչ խնդիրներ ունի այսօր քոլեջը:
- Գրադարանը մասնագիտական և  գեղարվեստական գրականությամբ համալրելու խնդիր ունենք, թեև ուսանողներն այսօր ավելի շատ օգտվում են ինտերնետից, որը նրանց տրամադրվում է անվճար: Իսկ մեր  «աքիլլեսյան գարշապարը»   եղել և մնում է  ուսանողական հանրակացարանի  բացակայությունը:
-  Հաճախ կարող ենք լսել, որ բուհի շրջանավարտն աշխատանք գտնելու խնդիր ունի, քոլեջի շրջանավարտը` առավել ևս: Այս պարագայում ինչպե՞ս  եք հիմնավորում միջին մասնագիտական և արհեստագործական կրթության դերը:
- Պարզապես պետք է  հասարակության մեջ  արմատացած թյուր տեսակետները և  կարծրատիպերը փոխել: Առողջ և ճիշտ   կառուցված հասարակության մեջ  պետք է լինեն և՛ բուհական կրթությամբ  բարձրակարգ մասնագետներ,  և՛  միջին մասնագիտական կրթությամբ միջին օղակներում  աշխատող բանիմաց հաշվապահներ, իրավագետներ, ֆինանսիստներ և այլն, ինչպես նաև հմուտ  արհեստավորներ:  Բնավ չթերագնահատելով  բարձրագույն կրթության դերն ու նշանակությունը`  կարծում եմ, որ  ավելի լավ է լինել  բանիմաց գինեգործ, հմուտ ատաղձագործ  կամ  լավ դերձակ, քան չկայացած  տնտեսագետ, իրավագետ կամ այլ մասնագետ:  Խնդիրը կարելի է դիտարկել նաև այլ տեսանկյունով. այսօր լուրջ ուշադրություն է դարձվում քոլեջների և գործատուների  արդյունավետ համագործակցությանը. գործատուն  ինքը ևս պետք է շահագրգիռ կողմ լինի  կրթություն իրականացնող հաստատությանն  իր պահանջներն ու ակնկալիքները ներկայացնելու առումով:
- Որո՞նք են քոլեջի զարգացման հեռանկարները:
- Քոլեջի նյութատեխնիկական  և մտավոր ռեսուրսներն  այսօր թույլ են տալիս ընդլայնելու  գործունեության շրջանակները տարբեր ուղղություններով`  մասնագիտական կողմնորոշման կենտրոնների ստեղծում, հեռավար ուսուցմամբ տարբեր դասընթացների և on-line  ռեժիմով կոնֆերանսների կազմակերպում, կարճաժամկետ ուսուցման դասընթացների իրականացում, տեղական և միջազգային կազմակերպությունների, գործատուների և կրթություն իրականացնող այլ հաստատությունների հետ համագործակցության ամրապնդում և այլն: Մեր համակարգի առավելություններից և զարգացման կարևոր գործոններից է նաև այն, որ քոլեջի լավագույն շրջանավարտները բոլոր մասնագիտությունների գծով կարող են իրենց կրթությունը շարունակել հետևյալ բուհերում` Երևանի պետական համալսարան, Հայաստանի պետական ագրարային համալսարան, Հայաստանի պետական տնտեսագիտական համալսարան, Հայաստանի պետական ճարտարագիտական համալսարան, Հայաստանի Խ. Աբովյանի անվան պետական մանկավարժական համալսարան, Գավառի պետական համալսարան, Գորիսի պետական համալսարան:
- Տասնամյակներ շարունակ Ձեր ղեկավարած կրթօջախը եղել և մնում է ավանգարդային  դիրքում. այն երբեք չընկրկեց  ժամանակի դժվարությունների առջև , ընդհակառակը, գոյատևման շրջանի խոչընդոտները հաղթահարելով` թևակոխել է զարգացման նոր փուլ: Ո՞րն է քոլեջի հաջողությունների գրավականը:    
- Պետք է միշտ գիտակցել, որ  ստանձնել ես պատասխանատու առաքելություն,  այն է` երիտասարդ սերնդի կրթության և դաստիարակության գործը,  պետք է միշտ հետևողական և պահանջկոտ լինել անգամ առաջին հայացքից մանրուք թվացող խնդիրներում: Աշխատանքային գործունեության ընթացքում ես իմ աշխատողի և՛ ընկերն ու ղեկավարն եմ, և՛ խորհրդատուն ու բարեկամը: Կոլեկտիվում ստեղծել ենք մի միջավայր, որտեղ մարդկային և աշխատանքային առողջ  հարաբերությունները նպաստում են  մեր  հաջողություններին և առաջընթացին: Աշխատանքում չանտեսելով ավանդականն ու  ձեռքբերումները`  պետք է միշտ զգաս ժամանակի զարկերակը, քայլես ժամանակին համահունչ, հետ չմնաս արդի պահանջներից և ,ի վերջո, պետք է պարզապես սիրես քո ուսանողին քո զավակի նման...